Атырауда «Ерик Мостовой» каналына 27 млрд теңгеден астам қаражат жұмсалмақ

Қалалық құрылыс бөлімі «Ерик Мостовой» каналының абаттандыру және дренаж жүйесін жобалау және құрылыс жүргізу бойынша тендер жариялады. Лоттың құны 26,98 млрд теңгені құрайды.

Жұмыстар «кілтпен» жүргізіледі: бір мердігер ізденістер жүргізіп, жобалық-сметалық құжаттаманы әзірлеп, мемлекеттік сараптамадан өтіп, құрылыс жұмыстарын жүргізіп, іргелес аумақты абаттандыруы тиіс.

Ұзындығы шамамен 16 шақырымды құрайтын канал 2000-шы жылдардың басында жер асты және еріген суларды бұру үшін салынған. Алайда, миллиардтаған бюджет қаражаттарына қарамастан, құрылыс жобалық және техникалық қателіктер себебінен толық қуатында жұмыс істемей қалды.

Соңғы жылдары канал тастанды су қоймасына айналып, қала тұрғындары үшін экологиялық және санитарлық проблемаларды туындатуда.